Que é un fogar patrocinado (e que non é)

Cando dicimos que Totukeli converte cada alugueiro nun fogar patrocinado, a reacción natural é imaxinar un piso cheo de logos. É exactamente o contrario do que estamos a construír, así que merece unha explicación en condicións.

A definición curta

Un fogar patrocinado é unha vivenda cuxo inquilino accede automaticamente a un catálogo de beneficios achegados por marcas: fibra, descontos de enerxía, colchóns, mudanza, seguros do fogar. Os acordos péchaos Totukeli unha soa vez con cada marca e valen para calquera alugueiro da plataforma — ninguén ten que negociar piso a piso.

Que NON é

• Non é publicidade dentro da vivenda. Nin carteis, nin banners, nin mencións forzadas.
• Non é un compromiso do inquilino con ningunha marca: os beneficios úsanse se interesan, e punto.
• Non é un custo para o propietario: publicar é gratis e o patrocinio non toca a súa renda nin o seu contrato.

Por que a unha marca lle interesa

Quen se acaba de mudar toma máis decisións de compra nun mes ca nos dous anos seguintes: contrata internet, dá de alta a luz, merca colchón, asegura a casa. Para unha marca, estar presente nese momento cunha oferta útil vale máis ca mil impresións dun banner. Esa é a única publicidade que cabe en Totukeli: a que se agradece.

Por que todos gañan

• O inquilino aforra desde o primeiro mes, sen buscar nada.
• O propietario aluga unha vivenda máis atractiva sen xestionar acordos.
• A marca consegue clientes reais no seu mellor momento, non impresións baleiras.

O catálogo de beneficios irase activando durante o acceso anticipado, e cada marca pasará unha revisión antes de entrar: se non achega un beneficio verificable, non entra. Preferimos un catálogo curto e real ca un longo e de fume.